流會之後 蘇錦樑叫郭偉強行快啲

【明報專訊】立法會上星期討論成立創新及科技局，但上周四因為開會時人數不足而流會，令決議案仍未通過，噚日再續會。商務及經濟發展局長蘇錦樑好緊張，似乎擔心再流會，所以親自致電唔同議員，希望佢哋開會。工聯會郭偉強曾經兩次因為慢咗幾秒入會議廳，搞到欠佢一個而流會，所以佢亦成為蘇錦樑嘅「溫馨提示」對象，前晚就已經打畀郭偉強，希望佢可以「行快啲」。


鐘聲響行出會議廳尋人

不過，郭偉強話，佢亦同局長講明今日下午先出現喺議會，但相信星期三大會出席人數會較多，都好穩陣嘅。佢又解釋上星期跑唔切，因為佢喺解放軍總部附近落的士時，點人數鐘聲已經響咗超過11分鐘，而且海旁附近行過嚟，亦要兜少少路，令佢始終都係差幾秒跑唔切囉。


而噚日討論呢個議程時，點算人數鐘聲亦不斷響，至於「狗仔隊」嘅工作，亦要由蘇錦樑、副局長梁敬國同政治助理陳百里親自做，政助、副局長不時喺點算人數時打電話畀議員叫佢哋返嚟，但據聞唔係次次大家都咁聽話，未必會立即行入去。蘇錦樑更多次行出會議廳尋人，希望建制派幫幫手早啲坐番入去。