《選戰》講普選 成港視開台劇大熱

【明報專訊】唔少人都好期待香港電視開台嘅新劇，前日起港視上載咗一批新劇精華片段，畀市民投票選擇開台劇，其中一套《選戰》（Election），好多人睇完好激動，因為劇情就係講普選，所以片段上載咗一日，至噚晚9點，已經有超過6.1萬票，大幅拋離排第二、獲逾8600票嘅《警界線》。唔少網民話《選戰》「好應節」，講出香港人嘅心聲。


李心潔選特首：港人值有普選

Emily睇番《選戰》1分鐘片段，主角包括李心潔、廖啟智等，畫面一開始即有字幕顯示「七百萬人要真普選」。劇中參選特首嘅女主角李心潔，喺片段中高呼「香港人值得一人一票，去決定心目中特首」，引起網民共鳴，話「識揀一定揀《選戰》」喎。


港視同Emily講，《選戰》已經拍到尾聲，全劇有15集，網民即日起至11月9日可以喺網上投票，11月10日會喺網站公布結果。