有話說﹕升讀英國高中 最好早兩年準備

【明報專訊】近排有不少海外升學展舉行，Happy Mama當然唔執輸去巡吓，索吓料。不少家長友好都話，香港近幾年變化好大，都在部署送仔女去外國升學，而且最近政治氣候不穩定，甚至有家長接受傳媒訪問時，話原本計劃明年9月送仔出國，家決定提早明年1月成行。


著名寄宿校 收生重面試表現

出國咁大件事，又豈能草率決定？Happy Mama同升學顧問Senate House的行政總監廖若兒（Vickie）傾過，佢話以升讀英國boarding school高中為例，家長最好預留兩年時間準備。佢話英國高中不設聯招制度，所以每個申請人都要逐間學校考入學試。通常英國高中的入學試會分幾份卷，包括英文、數學、科學及邏輯思維。而邏輯思維向來是香港學生的弱項，所以想入好學校就要及早準備。


Vickie又話英國著名的寄宿學校，好看重學生的面試表現，而香港學生的通病就是不夠膽說英語，加上未能有條理地解釋自己的想法，成為失分關鍵。她舉例﹕「例如有學生話自己嘅夢想係做飛機師，但當面試官問佢點解咁想做飛機師，佢又解釋唔到，失晒分。」


盡早訓練子女自理能力

除了準備入學試，家長亦要盡早訓練子女的自理能力。她解釋，英國寄宿高中特別重視學生的自律。不止日常生活，就連學習生活，學生都必須主動學習，因為當地冇補習制度，全靠學生主動提問。因此如果有心想送子女到英國讀書，就要及早訓練他們獨立，否則面試官一問：「你平時怎樣上學的？」「平常在家會做什麼？」學生已經露餡。


聽完Vickie嘅意見，Happy Mama反而覺得出國讀書是一個大家要共同合作嘅大project，爸媽、仔女要一齊出力，才可成功完成，多讓仔女參與，也可讓他們從中學習責任感、自律等。