睇沙皇馬車 「雙頭鷹」變「三頭」有因

【明報專訊】尖沙嘴歷史博物館不時有唔同主題嘅展覽，而今個月29號至明年3月16號會舉行「皇村瑰寶：俄羅斯宮廷文物展」，市民可以一睹昔日俄羅斯沙皇村莊「皇村」嘅物品，好似由6匹馬拉動嘅鍍金車廂、1856年出廠嘅王室馬車，馬車更係第一次離開俄羅斯，機會難得。


展覽由康文署同國立俄羅斯皇村博物館合作，皇村博物館馬車及馬具部館長伊琳娜•布列季欣娜話，呢個王室馬車曾被3個國王使用，極為精雕細琢，車蓋嘅雙頭鷹係王室標誌，為咗有立體效果，每個雕像都整咗3個鷹頭，國民喺不同角度仰視，都可以睇到沙皇嘅威嚴。


除咗馬車，展出嘅仲有85件精美馬具，全部係宮廷馬廄出品，每件都以絲絨同鑲邊金線製成；亦有200件包括畫像、服飾同手工藝品嘅珍貴文物。伊琳娜•布列季欣娜話，呢套馬車同馬具上一次完整展示已經係1913年，今次係百年來首度全套整齊地展示！