政府籲高官撐周融簽名

【明報專訊】周融又搞簽名喇！今日開始，「保普選反佔中大聯盟」連續9日會喺街頭及網上舉辦簽名運動支持警方，同埋要求「還路於民，恢復秩序，維護法治」。Emily收到消息，政府內部有通告「鼓勵」一眾問責官員、副局長同埋政助等要支持呢個簽名運動，因為活動強調維護法治。


「還路於民」今起街頭網上簽名

上一次嘅反佔中簽名活動，特首梁振英同埋至少9個官員，包括政務司長林鄭月娥、教育局長吳克儉都有簽埋一份。本身係民建聯成員嘅民政事務局政治助理徐英偉，上次仲喺facebook上載簽名嘅相，Emily問過，佢話今次會選擇喺網上簽名。


簽名嘅領軍人物、大聯盟召集人周融，曾經表明「佔中」如果成功就會離開香港。佔領行動就嚟一個月，有4萬幾名網民聯署要求佢履行承諾。周融噚日出席一個午餐會前就話，「佔中」並無成功，佢話自己為市民利益，要繼續同「佔中」鬥爭。佢已經收到以百計有關佔中嘅投訴，會向有關人等索償，相信會有愈來愈多人收到告票。