建銀稅貸送禮「向窮人傾斜」

【明報專訊】又到稅季，今年大家應該特別唔想見到個綠色信封，不過無論你合作定不合作，但點都要交番一筆，建銀亞洲就話，不如順手借個稅貸啦。一向愛玩噱頭嘅建銀，上年稅季就玩抽獎送股票，今年話唔益客人，轉益基層，只要客戶成功申請稅貸，建銀同叙福樓就會合共捐出5份叙福樓待用飯券。


成功申請 伙叙福樓捐飯券

噚日個發布會，建銀仲搵埋參與過港台節目「窮富翁大作戰」嘅叙福樓太子爺黃傑龍，佢話參與節目時，每日只有50蚊收入，20蚊用嚟搭車，剩番30蚊要解決3餐，所以間唔中有免費飯食，對窮人好重要。


小琴聽到眼濕濕，如果啲達官貴人都玩過「窮富翁」，就唔會思想歪曲，講啲「唔想政策向低收入人士傾斜」嘅廢話。


講番建銀個稅貸，借80萬以上實際年利率1.88厘，僅次於渣打嘅1.86厘，但門檻比渣打低，最長還款期24個月，算係各有千秋啦。


[小琴密語]