啱啱返港 財爺話唔知獅子山咩事

【明報專訊】特首梁振英（CY）原本準備喺嚟緊嘅星期日飛去倫敦，出席貿易發展局喺倫敦舉行嘅周年晚宴，不過Emily噚日收到風，CY突然決定唔去英國，啱啱噚日先由北京飛返香港嘅財爺曾俊華就臨時頂上。CY突改日程，唔知同佔中未解決有無關係呢？


貿發局倫敦周年晚宴係特區盛事，今年已舉行第31年，過去每年唔係特首或督爺，就係由政務司長或財爺過去主持，另見吓英國商界。自從CY上任特首後，就未去過呢個場合，2012年係林鄭月娥去，舊年由財爺主持。特首辦同財爺辦公室噚日都唔評論係咪行程有變。


講吓風塵僕僕嘅財爺吖，佢噚日結束北京行程返到香港，喺機場即刻被記者追問點睇有市民爬上獅子山掛上「我要真普選」嘅巨型黃色直幡，有記者仲立即向財爺展示相片。不過財爺唔知係咪「時運高睇唔到」，一邊笑笑口話「要睇睇先，我唔知呀」，一邊轉身離開。