示威者瞓鐵馬頂 阻中信搬欄

【明報專訊】金鐘中信大廈早前向高院申請到臨時禁制令，噚日有大廈職員向佔領者讀出臨時禁令，警方在旁拍攝。自稱黃先生嘅員工話，因大廈無消防通道，好危險，故要移除鐵馬。大批佔領者不滿路障被拆，竟然諗出一啲高難度動作阻搬欄。


其中一個女子用睡袋捲住身體，勉強瞓喺兩排鐵馬頂，難度高過行平衡木。職員勸阻無效，只好暫時停止移除行動。


中信大廈職員前日拆除鐵馬一度不果，噚朝趁無人留守再次嘗試清拆。此時有5名示威者趕至，聚集鐵馬前起哄阻止，並吸引上班族喺天橋上駐足圍觀。幾個泛民議員亦到場交涉，包括郭家麒、何俊仁、梁國雄等。何俊仁話，禁制令期限係星期五，早前已協調，如有問題，應交由消防及警方與示威者商討。梁國雄亦話，中信申請禁制令時，並無說明有關消防通道問題，建議留待星期五喺法庭再辯論。大廈職員同警員其後散去，在場佔領者重新加固鐵馬，留守現場。