余若薇旺角通宵 「唔係維和隊」

【明報專訊】旺角佔領區不時氣氛火爆，而自從日前工黨張超雄同公民黨毛孟靜落去「維和」奏效後，連日來都有唔少泛民議員深夜去旺角留守，而噚晚公民黨主席余若薇（Audrey）亦去咗旺角「當更」留通宵。


倘現衝突 將籲民眾冷靜

Audrey話，早前睇電視見到旺角有衝突，但認為只係有人故意挑撥，但唔清楚呢批人係咪其他組織滲入。佢又話自己唔係「維和部隊」，只希望一旦有衝突時，可以盡一分力呼籲民眾冷靜。


對於政府噚日提出嘅政改平台，佢話公民黨從來都唔排除參與任何推動真正民主嘅活動或組織，但佢強調「個波喺政府度」，政府必須提出一個實際解決方法，唔好再將民眾「當成3歲細路，帶佢哋遊花園」。


對於天主教香港教區榮休主教陳日君樞機呼籲群眾返屋企，Audrey話全因現時民眾對政改「冇乜耐性」，認為政府若要平息事件，必須提出實際建議，「最正路係重啟政改諮詢」 。