林鄭賣清英國物業

【明報專訊】政務司長林鄭月娥一向喺英國擁有兩個物業，但行政會議公布新一輪個人利益登記冊，就顯示林太最近已經再無登記喺英國擁有任何物業。林太候任司長時，透露過唔做局長後曾有去意，打算同丈夫、兩個仔喺英國生活，但最近就賣晒英國啲樓，中大政治與行政學系高級講師蔡子強話，林太今次嘅做法，令人揣測佢係咪要向北京表示忠心，表明唔會喺英國留後路。


除細仔留學 一家現居香港

政務司長發言人話，林太同丈夫已經出售喺英國同蘇州嘅物業，除咗細仔仍喺海外留學，司長一家家喺香港居住。發言人又話，司長已多次公開表示完成任期後退休，無意參選特首。


今次申報中，特首梁振英亦申明，無再擔任Hong Kong Virtuosi Ensemble嘅名譽贊助人職位。林太就出任第4屆大學生軍事生活體驗營名譽顧問，呢個體驗營解放軍駐港部隊都有幫助同參與。財經事務及庫務局長陳家強就由賽馬會會員「升呢」做遴選會員。


但最搞笑都係教育局長吳克儉，佢上年曾經透露漏報一間早喺2012年初已停止運作嘅顧問公司，但家都仲有登記做嗰間公司嘅唯一股東及董事，拖吓拖吓差唔多去咗半個任期。本報噚日透過新聞秘書向吳克儉查詢，至截稿前未獲回覆。