數字王國搞3D虛擬鄧麗君

【明報專訊】「一代歌后」鄧麗君過咗身19年，但好多歌迷都仲好掛住佢。好似小琴呢位小歌迷咁，間唔中都聽番佢唱嘅《何日君再來》、《我只在乎你》等等。仲記得舊年台灣歌手周杰倫喺台北小巨蛋搞演唱會嗰陣，特登請鄧麗君「出山」，同佢個3D立體投影人像，跨時空合唱。睇過啲片，個投影人像真係成個真人咁，企咗喺度唱歌，都咪話唔勁。


話說搞開投資嘅數字王國（0547），估計呢種生意有得做，前日就宣布同間叫TNT嘅製作公司合作，拎最多6,000萬出嚟，整間合營公司。呢間TNT嘅董事長係鄧麗君兄長，擁有鄧麗君嘅肖像同商標等權利，專門做3D立體投影影像，除咗演像會上面用之外，仲可以做埋電視劇、電影等。數字王國諗住利用鄧麗君喺華人地區嘅影響力，可以喺內地樂壇同大中華市場，做多啲呢方面嘅生意。


email: piano@mingpao.com

[小琴密語]