綠色和平聯盟改名綠色和諧

【明報專訊】發起綠絲帶行動嘅「香港綠色和平大聯盟」多次參與旺角集會，並曾疑透過WhatsApp號召市民到壹傳媒大樓抗議。大聯盟早前畀環保團體「綠色和平」入稟，法庭判大聯盟禁使用「綠色和平」名稱。Emily噚日喺旺角佔領區就見到大聯盟換咗個新名見人，就係香港「綠色和諧大聯盟」，唔知係咪大聯盟支持環保，無印到新橫額，索性喺舊橫額上手寫一個「諧」字，蓋住個「平」字。


組織召集人Jimmy話希望傳達和諧包容信息，無得用「和平」就唯有用「和諧」，意思都係差唔多，佢哋街站本身喺亞皆老街，早排因為衝突多而擱置，今日係改名後重新開張，改放喺西洋菜街路口，反而多人注意，Jimmy強調藍絲帶較激，而佢哋係和平喎，仲話歡迎戴黃絲帶嘅人同佢哋討論。