陳日君為保祿六世暫別佔領

【明報專訊】佔領行動嘅戲肉、學聯同政府嘅對話，將會喺聽日星期二上演。一直都好關心學生嘅天主教香港教區榮休主教陳日君樞機，就無緣見證呢個時刻，因為佢日前去咗羅馬，出席已故教宗保祿六世嘅宣福禮（相關新聞刊A22），要兩個星期後先至回港。陳樞機話唔係去做「逃兵」，只係「請假」，仲話返到香港後，如果戰友都被拉，「我也會來自首」。


「請假」到羅馬兩周

陳日君樞機噚日喺網誌撰文，同大家分享佢「戰場上的浪漫」。樞機開宗明義講明「來到了羅馬感到自己像個逃兵。不，我不是逃兵，我只是請假」，話羅馬之行已經係早已決定，「保祿六世在我眼中實在太偉大了」，所以唔捨得放棄出席。


似獲保祿六世安慰

雖然身在羅馬，但陳樞機心繫香港，話自己雖然好攰，但一諗起過去兩星期發生嘅事，都不能夠入睡。樞機話去到羅馬，好想「訪問」保祿六世，問吓佢「我這幾天有沒有做錯了什麼？」樞機覺得保祿六世好似有安慰佢，正如佢當天安慰喺街頭放聲大哭嘅戴耀廷教授，同佢講「我們沒有錯，放心」。