旺角重建「教堂」做崇拜

【明報專訊】旺角佔領區有唔少搞作，擁有唔少「信眾」支持嘅關公廟同「小教堂」喺上周五畀警方拆走咗，令一啲示威者不滿。Emily噚日就見到有幾個蒙面人物將小教堂「復活」，重新擺設耶穌畫像、聖經同聖壇，仲即場舉行崇拜！有份重設小教堂嘅基督徒義工陳到話，耶穌受難後復活，所以佢哋都趁周日幫教堂「復活」，仲話好在警方拆教堂當日佢哋有保留物資；而當日被「爆頭」嘅耶穌像，亦已修補好拎番出嚟。擔唔擔心再次「清場」？陳到話會盡力堅持落去，原則係「不反抗、不被捕」。


義工噚日將小教堂擴大規模，鋪上軟墊即場舉行崇拜，吸引近20人參與。基督徒鄭小姐噚日同朋友路過佔領區，順便參與咗街頭崇拜，佢覺得教會唔止限於建築物，邊度都可以聚會咁話。不過，亦有路過市民指罵佢哋「搞搞震」。


另外，關帝都喺彌敦道「復活」，重整關公嘅楊先生話希望大家唔好衝擊。祭壇仲有雞、燒肉同水果。