潮流興失聯 佳兆業急澄清

【明報專訊】唔知係咪因為諾奇（1353）事件太哄動，開創咗老闆失聯嘅先河。而近期正當大家關注雅居樂（3383）主席陳卓林被軟禁同執董黃奉潮失聯之際，噚日有本地電台話，市傳佳兆業（1638）主席郭英成被扣查，加入咗「失聯大軍」。雖然報道都有話搵咗佳兆業副主席譚禮寧求證，對方否認有關傳言，但公司股價依然插落嚟，收市插足6%，得返2.65元，成交額有成1.2億，成交股數創今年新高。


譚禮寧同小琴講，噚日響電話度都唔知解釋咗幾多次，佢同郭英成日日都有電話聯絡，噚日仲食過飯添，都唔知點解市場會有咁樣誤傳，公司噚晚都出咗個公告澄清；不過小琴睇返，佳兆業的股價已經連跌6日，加上雅居樂前車之鑑，小道消息隨時令股民變驚弓鳥，可能有「空軍」係想從中取利都唔定。


email: piano@mingpao.com

[小琴密語]