民生珠寶當「盈警一哥」

【明報專訊】通常爭到「第一」係開心事，但凡事都有例外。強泰環保（1395）9月底啱啱上市第一日就發盈警，創下上市後最快發盈警記錄。不過呢項記錄只持續咗半個月就已經「長江後浪推前浪」，民生國際（0938）分拆嘅民生珠寶（1466），未上市就先帶畀股民一個驚嚇，發盈警話上市開支大，預計截至9月底嘅半年業績會大幅倒退，嚇到噚日一上市，股價就急插水，最多跌咗三成。


以實物分派形式分拆上市嘅民生珠寶，前日公告話由於有1130萬上市開支，加上香港總部租金增加三成，同埋無咗稅務優惠，預計最近半年利潤會按年大跌。民生珠寶以全日最高位1蚊開市，跟住就調頭向下，最低跌至0.69元，午後雖回升，但收市亦較開市跌逾兩成。


近排新股表現認真麻麻，星期四掛牌三隻新股，噚日都清一色下挫，其中雅駿控股（1462）繼首日跌9%之後再跌4%，衍生（6893）同三和建築（3822）亦從首日升幅下調，睇嚟玩新股都係唔好太長情。