馬恩國曲線讚佔鐘學生

【明報專訊】保普選反佔中大聯盟法律顧問、民建聯馬恩國噚日建議市民可以申請禁制令，唔畀人佔領金鐘，不過，《蘋果日報》日前取得高等法院禁制令阻止示威者堵塞門口，但警方仍未有向喺蘋果門口、操鄉音嘅大媽或紋身漢採取行動，咁馬恩國又點解認為出禁令可以阻止學生佔中呢？

相信學生較尊重禁制令

本身係監警會成員嘅馬恩國就話，因為佔領金鐘嘅主要係有理想嘅年輕學生，相信會較尊重法律，一旦禁制令發出，唔使警察清場，部分學生都會自動走。言下之意，唔通佔領蘋果日報嘅人唔尊重法律？馬恩國就無正面回應，只係話相信學生會tame（易順服）啲。


警方喺處理近日佔領運動嘅手法惹起唔少爭議，連監警會多個委會亦睇唔過眼，要求監警會主席郭琳廣出聲。不過，馬恩國就話，好多人都誤會監警會可以影響警方行動，但佢哋只可以處理投訴。至於佢個人點睇警方執法？馬恩國話佢手上唔夠資料，未能分析。