《警聲》九成半內容講光明頂

【明報專訊】警隊近日飽受負面新聞困擾，社會連日嚟都等緊一個人出嚟解畫，佢就係「失蹤」多日嘅警務處長曾偉雄喇。Emily噚日就喺新一期警隊內部刊物《警聲》見到一哥「芳蹤」。


一哥勉同僚「頂天立地」

《警聲》中英對照共20版，除咗1版講內部福利資訊，餘下19版都係報道警隊應付「佔中」嘅Solarpeak（「光明頂」）行動，頭版就係一哥月初探訪處理佔中警員嘅情况，不過同佢一齊探班嘅梁振英、林鄭月娥同保安局長黎棟國就唔見咗影。一哥當日金句「你哋無做錯到！」《警聲》無recap，不過就寫咗一哥叫大家「做一個頂天立地的警察」。


第二版係「未來一哥」大熱、副處長盧偉聰探班嘅情况，內文仲透露「糧草」車被示威者多次截停，警方就以「螞蟻搬家，化整為零」方式送飯，似足平時談及罪案用語。處長同副處長都出咗，第三版就係好受大家歡迎嘅「4點鐘許sir」許鎮德，可見許sir家喺警隊中嘅分量！


精彩內容仲有刊登市民表揚信同埋幾版圖集（圖），不過警方施放催淚彈嘅圖就欠奉嘞。