中大人搞「迎新營」恭候偲嫣

【明報專訊】發起藍絲帶運動嘅「正義聯盟」召集人李偲嫣之前話要去中大同港大，搵校長沈祖堯同馬斐森，要佢哋交代點處置喺兩間大學教書嘅佔中發起人陳健民同戴耀廷，亦會「通緝」戴、陳，要兩人履行承諾自首。一眾中大人知道「偲嫣BB豬」要嚟中大都好興奮，即刻喺facebook開咗「偲嫣迎新營」專頁（圖），召集人馬「歡迎」偲嫣，仲特登為佢度身訂做咗幾首新beat，準備到時dem畀佢聽。


「正義聯盟」facebook專頁噚晚就公布，今朝10點喺旺角麥花臣球場集合，仲有旅遊巴接送，但無話去中大定港大先。中大「偲嫣迎新營」搞手就建議大家自行組隊遍地開花，分頭「恭候」佢，仲要邀請佢一齊討論、發表意見，之後就可以dem偲嫣beat、唱生日歌、唱《香港生命》等。同埋偲嫣過門都係客，所以建議組爸組媽唔好講粗口、唔好人身攻擊。


雖然知道各個中大老鬼都好想一睹偲嫣BB豬風采，但搞手話擔心日間佔領區唔夠人，會被警方清場，建議各佔領區嘅佔領者留守。