梁志祥引黃飛鴻 證雨傘係武器

【明報專訊】大批市民喺佔領行動中用雨傘遮擋胡椒噴霧，被當作攻擊性武器。為咗證明雨遮真係好有攻擊性，民建聯立法會議員梁志祥將黃飛鴻擺上枱，話「以我所知，喺民國時代，雨遮係一種攻擊性兵器」，因為佢睇黃飛鴻啲劇集，都見到黃飛鴻用遮做武器，同「奸人堅」格鬥，仲反問議員「唔通同事完全無呢種基本歷史常識？」梁志祥將劇集橋段當歷史「常識」，連民主黨何俊仁都話佢嘅言論「歎為觀止」。


話催淚彈趕唔走人係「無用武器」

噚日立法會大會繼續休會辯論政府同警方處理佔中集會嘅手法，梁志祥除咗拉黃飛鴻落水，仲話催淚彈同胡椒噴霧都無法趕走市民，係「無用嘅所謂武器」。有示威者話，雨遮咁勁，咁不如市民同警察交換武器用啦！


梁志祥亦憶述細個喺鄉村長大，長輩經常提醒佢出街要帶遮，因為遮可遮風擋雨遮太陽，仲可以「打狗用」，由此可見遮嘅攻擊性唔低。


講完黃飛鴻，梁志祥就講詠春拳。佢話詠春拳最高招數就係「裙下一腳」，即係用裙遮掩再腳踢。佢話示威者正正係高舉雙手再腳踢警員，令警員受傷，認為廣大市民一定可以公正地評論。


譚耀宗引YNWA勉警 辣㷫利記球迷

另外，民建聯譚耀宗就引述英超球隊利物浦嘅格言「You'll never walk alone」勉勵警隊，令一班本地利物浦球迷強烈不滿，仲喺facebook發起聯署譴責佢嘅言論侮辱球迷。