梁錦松籲政府搵地助創業

【明報專訊】前財政司長梁錦松計仔多多，噚日就去咗青協一個世界青年創業論壇教後生仔創業。阿松話，喺美國，唔少創新意念都係喺車房諗出嚟，但在香港，無論喺中環甚至山頂，停車地方都唔夠，何來有空間畀人研發創業。佢呼籲政府要搵多啲地方畀年輕嘅創投公司發展，例如可以放寬工廠大廈用途嘅限制，令呢類創業公司有更多機會發展。


梁錦松雖然離開咗政府，但仍對政府政策非常上心，噚日更主動批評限奶令，認為商業問題應商業解決，又話知道唔少港人，對香港唔少基建例如鐵路、醫院被外來人霸佔感到不滿，但始終認為人才同資金一樣，對發展經濟好重要，鼓勵政府要有實際措施吸引創業人才來港。


佢又評論到新加坡，引述有人話新加坡成功係因為政府，但香港就唔係因為政府成功，重提自己喺2002年指政府應做「積極的市場促進者」嘅說法。佢話香港始終有一樣優勢係新加坡無嘅，就係香港係中國一部分，認為香港應把握好機會。