之鋒夠秤日 盼年年無今日

【明報專訊】黃之鋒「夠秤」喇！噚日係學民思潮召集人黃之鋒18歲生日，一班學民戰友喺街頭同佢慶生，又送上一份特別嘅生日禮物，就係一本由學民仔女同香港市民寫畀佢嘅紀念冊，之鋒話「希望年年無今日」，因為唔使再佔領。踏入18歲，法律上不再係「兒童」，而係「成年人」，之鋒噚日接受商台訪問時話，若繼續參與目前嘅佔領運動，「成年人嘅刑責會重好多」，已經做好坐監嘅心理準備。


想吃屋企飯 掛住張牀

之鋒仲話，唔會因為年紀大咗而有顧慮，亦都唔怕秋後算帳，因為公民抗命正正係要以和平非暴力方式抗爭，然後承擔法律責任，「所以假若期望警方事後不會檢控，就係不負責任」。


踏入生日嘅晚上，之鋒留守金鐘添美道，無返屋企，自覺對唔住屋企人，「由罷課運動至今約三個禮拜，被人拉羈留到之後獲釋，都很少同屋企人見面」，「生日飯」都要提前兩日食，「6點幾開始食，7點幾就要趕回佔領現場」。被問到除咗政治訴求有咩生日願望，之鋒話最想「返屋企食飯同瞓覺，好掛住屋企張牀」。


另外，社交網站「民主真兄弟」昨聲稱公民黨着手為黃之鋒安排後路，若抗爭行動失控或結束後，會安排黃到美國駐港總領事館尋求政治庇護，不但可免黃被秋後算帳，亦可將今次學運搞成港版「六四」，仲話計劃亦獲黃嘅雙親支持。黃之鋒噚日強烈否認，批評說法「無中生有」，話生日都被人抹黑、無癮。