唇讀狀元不再怕打字

【明報專訊】自幼失明弱聽、以唇讀學習嘅英華女學校畢業生曾芷君，去年憑着文憑試3科5**佳績獲中文大學翻譯系取錄。一年過去，「唇讀狀元」接受馬會刊物《駿步人生》訪問，分享大學生活，佢話儘管天生視障、弱聽及手指觸感較弱，都無阻佢努力學習嘅決心，仲借助新科技儀器克服重重障礙，從此唔再怕打字。芷君嘅大學生活一樣多姿多采，除咗讀書，仲會嘗試做義工，分享生活體驗。


芷君笑容仍然燦爛，佢喺訪問中話，「我未見過向日葵，只是聽到老師在堂上描述梵高的作品《向日葵》，是朵朵金黃色的花，我喜歡黃色，因為充滿朝氣和希望」。


芷君話大學與中學生活有好多分別，例如第一次一個人住宿舍，要自己處理各樣生活細節。學習模式都唔同咗，中學有課本，做功課以點字為主，大學就用電腦，利用發聲軟件閱讀，同以前睇凸字書好唔同。


芷君嘅手指觸覺較弱，用電腦鍵盤會移位，發一個電郵要半個小時，幸好有理大賽馬會復康科技中心譚永昌教授同佢嘅團隊，喺鍵盤貼上8個杯狀配件，方便芷君打字嘅時候，將手指套入凹位，固定位置，按鍵準確度大大提高，從此唔再怕打字。譚教授又將口琴式點字顯示器加裝支架，支撐芷君嘅頭部，方便唇讀，仲可以一邊閱讀顯示器嘅點字，一邊操作鍵盤，節省唔少時間。


芷君話，每個人都有困難，隨着成長只會愈來愈多，應抱住「前事不忘，後事之師」態度，回想過去如何闖過難關，從中借鑑，拿出勇氣同耐性，應付面前挑戰。