梁美芬議會長氣 李卓人唱生日歌

【明報專訊】各個佔領區，每逢佔領人士遇到反佔中踩場，都會唱生日歌回敬，希望勸退踩場嘅人，而呢個場面噚日就喺議會內出現。噚日立法會內委會復會，討論分別由獨立黃毓民、經民聯林健鋒提出引用權力及特權法，調查佔中嘅動議，建制派表明要查就全套查，即係由佔中成因、資金都要查，泛民當然唔同意。


梁美芬疑英美勢力操控佔中

呢啲討論最終變成各自表述立場，建制派力數佔中係有組織，其中經民聯梁美芬質疑，佔中有英美勢力操控，又話佔中令原本純樸嘅校園有白色恐怖，講到時間夠晒都唔肯停，結果工黨李卓人就頂唔順，大聲唱起「恭祝你福壽與天齊……」嘅生日歌，民建聯蔣麗芸就問，乜議會可以唱歌㗎咩？

噚日內委會選主席時，原本大家都無異議，由經民聯梁君彥擔任主席，但係人民力量陳偉業唔會輕易畀佢自動當選，於是就話覺得梁君彥做得好差，於是先後提名民建聯蔣麗芸、鍾樹根，工聯會王國興，新民黨田北辰等人做主席，建制派拒絕接受提名，擾攘一輪，結果人力陳志全就提名社民連梁國雄，而大舊就提名埋范國威競逐，雖然選舉有競爭，但結果一如所料，由梁君彥攞到39票當選，長毛就有14票，范國威亦有6票，另外有4張廢票。