周融話黑社會或是受害者

【明報專訊】佔領行動持續接近兩星期，「保普選反佔中大聯盟」召集人周融噚日終於忍唔住要幫港人出聲，怒斥佔領行動破壞法治，亦令警員淪為出氣袋，要求示威者「畀番條路香港人……畀警方繼續正式正當地執行法治」。周融仲話，唔排除黑社會都係佔領行動受害者之一，但強調佢唔支持黑社會喎。


記者會上，有美國《華爾街日報》記者問周融點睇旺角嘅反佔中衝突涉及有背景人物，周融回應話唔清楚該報記者對旺角有幾熟悉，指旺角係香港黑社會搵錢最多嘅地方，如果旺角停止運作，「黑社會受影響，咁佢哋有可能會有所行動」。但佢話唔支持黑社會，亦話任何人自稱三合會成員都係犯法嘅。


大聯盟計劃組成義務律師團，為受佔領行動影響嘅人提供法律諮詢。同時發起「畀個like阿sir、madam」行動，呼籲市民喺街上見到警察，可以鼓勵吓佢哋。