佔旺區突然滿街神佛

【明報專訊】早前有旺角佔領者疑被黑道中人、反佔中者打到見血。可能迎合番旺角嘅氣氛啦，前晚Emily發現，喺旺角道同彌敦道交界，有人擺出黑幫同警察都爭相拜祭嘅「關帝」像，有人噚日仲上香"口添"。

有人喺旁邊放上寫有「保護學生」、「抗爭成功，心誠則靈」標語牌，希望關帝保佑佔中運動。Emily現場所見，關帝像前面擺咗香爐，有人曾經燒香同點紅燭，仲有燒酒、燒味、水果等祭品。而旺角其他示威者架設嘅路障，其後亦紛紛出現關帝像。另外，噚日有人將耶穌像同聖公會嘅《公禱書》帶到路障前，旁邊有兩支蠟燭，有人仲寫咗一篇祝文庇佑示威者，又叫耶穌保路障無損。