怕小強佔領者 露宿有法

【明報專訊】佔領運動持續，每日都有唔少人喺佔領區域露宿，而過去兩晚天氣好轉，就有唔少人去添馬公園瞓草地。剛大學畢業嘅李小姐自上月27日後一直留守金鐘，起初兩日會返屋企梳洗，再返金鐘，但近日就無返屋企，「夜晚去灣仔港灣道體育館冲涼，以前嘅宿舍宿友幫我帶走衫褲返宿舍清洗」。


李小姐坦言「怕污糟」，「最怕曱甴」，但家習慣咗瞓地，佢會將背包當枕頭，「呢兩日有朋友送上露營墊，唔使直接瞓地」。另外，恒生管理學院市場學系三年級生黎同學話，有三四晚通宵留守，本來只鋪垃圾袋瞓地，後來有示威者送上野餐墊鋪地，總算舒服少少。


而喺旺角佔領區，有啲人一直留守，但亦有學生同Emily講佢哋每日日頭返屋企，冲涼食飯後就喺夜晚折返旺角，同朋友吹吓水咁又一晚。