星洲撐佔中晚會外國人被警問話

【明報專訊】海外繼續有唔少人撐香港嘅佔領行動，不過新加坡發生咗唔太愉快事件，Emily噚日留意到當地傳媒報道，周三（1日）晚過百名市民喺芳林公園（Hong Lim Park）嘅「Speakers' Corner」舉行燭光晚會，支持香港學生同「雨傘革命」，當中有幾個參加者唔係新加坡永久居民，畀當地警方帶走問話，不過就無人被拘捕。當地傳媒引述警方發言人話法例規定，外國人只可旁觀、唔可以參加示威集會。


多國留學港生黑衣集會聲援

另一邊廂，噚日分別有身在奧地利、美國亞特蘭大嘅留學生發起撐香港集會，而今日適逢周末，身處德國、英國、瑞士同溫哥華嘅香港留學生，分別發起最少5場黑衣或衣集會，聲援香港人爭取民主。英國方面會喺伯明翰一個公共廣場舉行，facebook專頁顯示有過百人參加，至於瑞士伯恩集會就有超過220人表態準備參加，兩個地方嘅留學生都話想引起國際關注，宣揚今次香港嘅民主運動。