紅隧塞車阻見病媳？ 區家麟質疑真偽

【明報專訊】本周一有一個婆婆「容姐」打電話去香港電台第五台《有你同行》節目，話周日佢同家人到港島見患癌症病重嘅媳婦最後一面，但遇上海底隧道「大塞車」，塞咗4個鐘，到醫院時媳婦已去世，批評佔中連累其他人。傳媒人區家麟翻看嗰日嘅新聞並無話紅隧塞車，而佢喺當日晚間約10點步近告士打道近華潤，遠望隧道口，交通非常疏落，質疑塞車說法係咪真，仲質疑容姐嘅一啲描述。


Emily打去問港台，發言人話基於私隱，唔會畀婆婆嘅聯絡方法跟進，並解釋呢個係長者節目，唔係新聞「烽煙」節目，主要畀長者打上電台講心事，當時婆婆話自己有親人去世，主持人需要盡力撫平對方心情，難以喺對方哭訴時質疑婆婆講嘅內容係咪真確，佢話，婆婆講嘅情况係咪真實，由聽眾自己判斷。