王石潘石屹暗撐佔中？

【明報專訊】香港佔中運動進行得如火如荼，新聞喺內地就一概被河蟹。小琴見到有內地媒體上載咗佔中嘅相，圖片說明係寫「香港萬人集結，歡慶國慶！」小琴又嘗試喺微信上載關於佔中嘅評論文章，內地友人一律話開不到鏈接。


不過，並非所有內地人都被蒙在鼓裏。內房龍頭發展商萬科（2202）嘅王石老總，同埋SOHO中國（0410）主席潘石屹好明顯就知道發生咩事，雖然冇明確表態，但似乎想打「擦邊球」暗撐佔中。


潘石屹喺微博上載歌曲「東方之珠」音樂鏈接，唔知係咪暗示香港呢粒珍珠家仲有冇人珍惜；王石就喺微博上載「韓國生態研究院見聞」講催淚彈嘅由來（圖），話催淚彈最初發明嘅靈感喺來源自植物，現時已「為警察所用」。王總一向關心時事，此時講起催淚彈，係咪想聲援我哋被催淚彈摧殘嘅香港百姓呢？


[小琴密語]