章子怡阿媽揸16億元萬達

【明報專訊】今時今日恐怕無咩人唔識嘅國際級明星章子怡，嚟緊可能要再加多個「女富豪」嘅銜頭畀佢，事關有內地傳媒查到，最近搞緊嚟香港上市嘅內房股巨無霸大連萬達，入面有個叫李涿生嘅股東，盛傳就係章子怡阿媽，即係話萬達一上市，章子怡（阿媽）就坐擁16億人仔身家。


手持1800萬股

小琴睇過萬達招股書，入面只係話公司有125個個人股東，名就欠奉，但根據嗰個調查報道，喺萬達最新工商資料入面發現其中一個股東叫李涿生，仲確認呢位李女士就係章子怡阿媽，以章媽媽揸住1800萬股計，如果萬達成功上市，粗略估計呢批股份市值將會超過16億元人民幣。


如果唔係阿里上市，萬達老闆王健林都可能仲喺中國首富，可想而知萬達有幾出名，最重要係，王健林盛傳同中共前領導人薄熙來老友鬼鬼，據說薄熙來同章子怡又私交甚篤，你話世界幾細呢？

email: piano@mingpao.com

[小琴密語]