田二少以鞋喻政改 稱與習近平一樣

【明報專訊】國家主席習近平前日接見本港富豪時，講香港搞普選要符合國情及港情，話「鞋子合不合腳，自己穿著才知道」。新民黨副主席田北辰話，佢哋上周五訪京見人大委員長張德江時，佢咁啱都有同張德江講韓非子「鄭人買履」嘅故事，同樣以鞋比喻政改，唔知習主席鞋子論同佢講嘅故事有無關連。


話張德江聽完讚賞

田北辰話，上周五見張德江，佢提到買鞋古仔。佢噚日同Emily講，例如著開8號鞋，但唔代表再買一對8號就啱腳形，因為鞋款大小不一，反而應該先試穿。田二少所以講政改方案應該去親驗「著吓先」，叫泛民唔好只堅持國際標準而唔要普選，試都唔試。田北辰話，張德江聽到佢講故事時表示讚賞，唔知張德江有無將呢個故事轉述畀習近平。


京官講買鞋唔係第一次，好似中聯辦主任張曉明上月見泛民政黨時，都有勸告泛民，話每個人要尋找自己最適合嘅鞋，政改要尋找適合香港嘅一套。