四叔割眼袋 戴黑超保護

【明報專訊】由工商界及專業人士組成嘅訪京團，前日獲國家主席習近平接見後，各人各自回港。而喺北京時，人稱「四叔」嘅恒地主席李兆基成日戴住副「黑超」，Emily仲以為80多歲嘅四叔有白內障，八卦打聽先知道四叔因為眼袋下垂，啱啱做完割眼袋手術，喺習近平會見訪京團時，四叔除咗副黑超，眼瞼下貼住兩塊膠布「曝晒光」。


四叔都有話畀朋友知，佢啱啱做完割眼袋手術，仲話係秘書幫佢安排手術，秘書唔記得四叔要訪京，否則就可以將手術推遲啲至做。恒地公關稱沒有回應。


今次訪京團冠蓋雲集，90歲嘅嘉里主席郭鶴年都有去，佢睇嚟精神唔錯。喺習近平接見訪京團途中，郭鶴年腸胃有啲不適，中聯辦主任張曉明上前扶住佢，同佢出咗去一陣，返嚟時習近平都有問候佢。


李澤楷頻撲陪誠哥

訪京團另一亮點係長實集團主席李嘉誠，誠哥喺會場周圍同啲老朋友打招呼，不過大仔李澤鉅就無同行。據知，佢哋三仔爺其實有分工，李澤鉅飛咗去歐洲處理業務，細仔李澤楷就由美國紐約飛過嚟會合老竇，陪住誠哥見習近平，之後又返美國，認真忙碌。