回應陳智思選特首否 陳有慶﹕阿仔決定

【明報專訊】為期三日兩夜嘅富豪及專業人士訪京團噚日來到第二日，亦係唯一一日有官式活動行程，唔少富豪噚日見完國家主席習近平、與人大委員長張德江晚飯後，就即晚離開，令人想到佢哋赴京都係為見習主席一面。好似全國政協常委唐英年，前晚接近凌晨先搭私人飛機到北京，噚晚就離開，Emily問佢點解走得咁急，唐唐就話做完嘢咪走囉。


唐唐即晚離開 「做完嘢咪走」

雖然部分富豪團成員經常離隊，但都有例外。Emily噚日午飯時就見到全國政協常委陳永棋同全國僑聯副主席陳有慶等人一齊食飯。政界曾經傳出陳有慶唔想個仔、即行會成員陳智思選特首，究竟係咪屬實？佢又係咪想陳智思專心打理家族生意？


李嘉誠請記者食早餐

陳有慶噚日話公司生意同阿仔嘅健康都好重要，至於想唔想陳智思選特首，呢個就要阿仔自己決定。陳智思不時公開講，要幫手打理家族生意，未諗選特首一事。另外，陳智思心血管唔係咁好，所以唔少人都關心健康問題會唔會影響佢嘅政途。


今次訪京團嘅團員各有性格，唔少團員喺外面自己搵地方住酒店，無跟大隊下榻貴賓樓。好似長實主席李嘉誠，就入住自己喺北京嘅君悅酒店，吸引咗唔少記者行家喺酒店門口等佢。


誠哥噚日朝早原本打算請記者入君悅食早餐，但見到記者唔敢離開，最後就派職員送上豆漿、煎蛋同油炸鬼畀記者食，認真識做。下午一度傳出誠哥有嘢想講，佢確有現身，但就話暫時無嘢講嘞。