CY兌諾定孔誕日

【明報專訊】特首梁振英噚日出席香港「孔曆二五六五年孔聖誕環球慶祝大典」，同時宣布，今年起每年9月第三個星期日都會定為孔聖誕日，換言之，噚日亦係全港首個孔聖誕日，但佢無講到會唔會將呢日列為公眾假期，所以大家未必有多一日假放。


梁振英噚日致辭時，讚頌孔子係萬世師表，對中國歷史同社會影響深遠。根據梁振英競選特首嘅政綱，提到設定孔教日及道教日，舊年佢就將每年3月第二個星期日列為道教日，今年終於輪到孔教日，可謂兌現咗兩項競選承諾。再睇番啲舊料，梁振英喺2012年競選時提出設立孔教日，10名孔教選委喺提名階段，其中7人提名梁振英選特首。