鐵路藍圖搞錯數字

【明報專訊】政府啱啱公布最新鐵路發展藍圖，包括7個鐵路項目，唔少市民都關心新鐵路線嘅車站同走線係咪方便自己。不過，由政府委託嘅顧問公司AECOM，喺整理鐵路發展藍圖嘅環境評估數據時，擺咗個大烏龍。份文件打錯咗北環線同南港島線（西段）走線影響高生態價值棲息地嘅面積。喺未修正之前，文件顯示北環線可能影響44公頃高生態價值棲息地，南港島線（西段）就影響10公頃；但實際上北環線可能影響4.4公頃，南港島線影響1公頃，足足多咗成9倍。


文件又打錯咗藍圖提出，話一旦興建7項鐵路方案，有關地面走線合共會影響41公頃自然林地、6公頃濕地同9公頃自然河溪，但全部都大咗9倍，政府話正確應該係4.1公頃自然林地、0.6公頃濕地同0.9公頃自然河溪。


路政署：已即時更正及致歉

路政署話，顧問已經即時複檢數據同更正文件內容，並就事件引致嘅誤會向公眾致歉。


有環保人士同Emily講，都唔知鐵路藍圖有無經過深思熟慮，呢啲基本數據無理由錯，亦可以見到政府審核工作粗疏；但佢哋都關注無論鐵路影響嘅面積係大定細都好，政府都要做好環境保護工作。