哈囉喂開鑼限制級鬼屋預約爆滿

【明報專訊】下月底係萬聖節，標誌住一年一度海洋公園「哈囉喂」又開鑼。Emily留意到，雖然哈囉喂上星期日已經開始，但直到下月1日都畀各企業包場，市民要到下個月2號之後先可以參與。今年哈囉喂亮點除咗有亞洲首個以萬聖節造型登場嘅多啦A夢，仲有首推要預約嘅限制級鬼屋「H14」，海洋公園話首輪3日登記名額已全部爆滿，第二輪登記將會喺下周一展開。


海洋公園噚日喺新建嘅室內表演場地怡慶坊舉行「海洋公園哈囉喂全日祭香港女童軍愛心慈善日」，新主席孔令成同榮譽顧問盛智文等高層，同埋香港女童軍總會香港總監何超鳳等獲邀出席，率先試玩鬼屋，為女童軍總會籌得超過130萬善款。