罷課音樂會 老毛被參與

【明報專訊】大專院校下周發起罷課，抗議人大常委會對政改嘅決定，而城大學生會喺罷課前夕，唔知係咪想大家輕鬆吓，或者聚埋一齊增加士氣，聽晚（周五）6點半會喺校園舉辦「罷課不罷樂音樂會」，邀請香港唔少地下樂隊同歌手表演，好似「怒人」、「雞蛋蒸肉餅」等。


諷時弊地下樂隊 或唱粗口歌

負責籌備音樂會嘅城大創意及媒體學院學生李卓軒話，7隊表演嘅樂隊，都係以創作關心社會歌曲而聞名嘅，大會唔會局限佢哋選歌，但相信「怒人」樂隊會獻唱好應景嘅諷刺時弊粗口歌，其中一首歌詞係咁嘅﹕「一國一制！我唔X制！……西環治港！亂世咪再平凡！」李卓軒話已經成功向城大訂場搞呢個音樂會，截至噚晚已有近200人喺facebook報名參加。


不過佢哋張宣傳海報都算爭議，惡搞已故領導人毛澤東。老毛同罷課唔通有關？海報就解釋，其實毛澤東喺1919年時就喺湖南組織學生成立聯合會，發動學生以總罷課響應五四運動。


城大罷課委員會成員李澤民話，搞音樂會係因為覺得佔中同罷課搞手好辛苦，想幫佢哋減吓壓，家仲嘗試邀請學聯同埋佔中人士到場發言。


澳洲留學生校園派黃絲帶支持

除咗本地學界外，海外都有唔少人支持香港罷課，有喺澳洲嘅留學生發起黃絲帶行動支援罷課，其中有留學生噚日同下周一，喺悉尼4間大學校園派黃絲帶，以示支持香港學生嘅抗爭行動。


另外，一班大專學生會舊生都出面撐師弟妹罷課，並於周日（21日）下午2時半，喺金鐘添馬公園舉行「舊生撐罷課 誓爭真普選」活動。