議員考察芬蘭 發現「高度自治」

【明報專訊】立法會代表團喺北歐訪問8日，呢幾日佢哋就喺芬蘭，其中資訊科技界議員莫乃光（Charles）考察之餘，不斷喺facebook上載相片，講吓佢哋行程睇咗乜嘢，好似噚日佢哋就去咗一間科技創新撥款機構Tekes，佢話呢間公司舊年投資科研發展就用咗5.77億歐元，莫乃光話呢個撥款，一年就等於香港15、20年。


當地重科研 大讚政策好

莫乃光話，芬蘭科研撥款重視直接協助由大至小嘅私人公司，香港就大部分去咗大學同官方科研中心；芬蘭講明要投資畀願意冒險嘅公司，政府亦唔會要研究結果嘅任何知識產權，Charles大讚當地政策好，仲話其實創新科技政策不難，「換咗政府個腦就易得多了」。


佢哋喺芬蘭亦有同當地外交部官員見面，莫乃光話芬蘭Aland Islands其實可能係創出「高度自治」、「一國兩制」嘅地方﹕近100年前，Aland「公投」要求投向瑞典，但芬蘭唔肯，堅持維持Aland為國土，寧願給予Aland高度自治、中立地位同其他各種優惠。