記者「飛仔華」出殯 一哥率隊致祭

【明報專訊】跑過40年突發新聞、行內人稱「飛仔華」嘅鄭炳華，上月因癌病離世，終年59歲。Emily及不少行家噚日到其喪禮致祭。華哥喺香港首創聘用送薄餅電單車人員做突發記者，以便最快到現場做到「有圖有真相」，自己跑新聞時喺警隊內廣結人脈，噚日喺「一哥」曾偉雄率領下，高級助理警務處長職級或以上警官（除刑事及保安處長羅夢熊不在港），全部到齊，保安局長黎棟國亦有到場致祭。


鄭炳華曾喺《成報》、《蘋果日報》任職，臨終前為《星島日報》及《頭條日報》總採訪主任，入職初期經歷過警察與記者鬥快到場、筆桿子與槍桿子「合作無間」嘅年華，最經典莫過於1992年廣州樓圍剿悍匪一役，華哥借「大哥大」電話畀警察，以便與外聯絡及提供重要資料供飛虎隊部署。


治喪委員會與鄭妻揀咗張「破格」嘅靈堂大相，相中華哥舉起V字手勢，Emily聽講係希望展現到佢生前調皮自信嘅一面。