建制小花狙擊 阿基出招保議席

【明報專訊】超級區議員馮檢基扎根深水埗多年，建制派其實都吼實佢個區議會議席，特別如果佢輸咗區議會，即係下屆立法會，就唔可以再循超級區議會參選立會，所以建制派都好落力，上屆選舉工聯會派出做開新家園協會嘅范國輝挑戰佢不果，最近就派小花出征。阿基話工聯會有個社區幹事陳穎欣喺佢麗閣選區密密做，呢位小花來頭唔小，持有雙碩士學位，搞到佢哋都擔心喎。


阿基話，對家喺地區都好勤力，星期一至五都喺區內派飯盒，搞到佢嘅地區職員都好緊張，最近阿基亦聯絡緊地區人士，等佢哋可以喺星期六、日於區內都可以免費派飯。Emily唔知派飯可以幾幫到選票，但相信該區居民有口福，因為可能日日都可免費開飯。


阿基今日起卸任泛民飯盒會召集人一職，佢噚日同傳媒回顧工作時，坦言都有相熟街坊話佢變咗好多，家激進咗，佢話有可能會流失選票，但為咗爭民主，都要放下考慮，相信日後專注民生問題可以「補鑊」喎。