傷健潛水員做珊瑚普查

【明報專訊】香港水底世界絢麗多姿，唔少水域有珊瑚。漁護署自2000年起招募義務潛水隊參與珊瑚礁普查，今年多達63隊，潛水員逾600人，創歷年新高，當中國際傷健潛水協會連續3年派員參與，體現傷健共融。政府新聞網訪問有參與普查嘅殘疾人士，佢哋都話潛水時地心吸力減少，令佢哋變番普通人，動作靈活矯捷，重拾自信。


國際傷健潛水協會主席葉健強本來係沙灘救生員，11年前跳水受傷四肢癱瘓，從此與輪椅為伴。唔認命嘅佢繼續追尋海洋夢，仲加入國際傷健潛水協會學潛水，去年當上主席，喺珊瑚普查活動中負責統籌。


隊友抱腳划水 體現傷健共融

葉健強話，下水後係另一個世界，最大分別係唔使用輪椅，自由活動。潛水時佢要由隊友抱住雙腳，以免撞到海牀，自己就靠雙手划水，推動向前。協會秘書丘志財患小兒麻痺症，亦無阻佢擁抱海洋，已經連續第6年參與普查，經常陪殘疾人士下水，擔當義工，佢話喺水中嘅平衡力好過唔少人，完全唔覺得自己行動不便。


漁護署高級海洋護理主任周永權話，珊瑚普查講求團隊合作，確能體現傷健共融精神。佢仲話觀察到，傷健團隊嘅表現有時仲好過普通團隊。