吳明欽大狀女兒出擊

【明報專訊】政府總部加設圍欄受司法覆核挑戰，代表入稟嘅大律師，噚日同民主黨何俊仁一齊，向傳媒講解呢次司法覆核嘅理據。原來呢個年輕貌美嘅大律師，係已故民主派「三料議員」吳明欽千金吳思諾（Senia）。Senia今年5月至獲得大律師資格，今次係佢第一次跟足成單案，佢話嚟緊希望喺弱勢社群、人權自由問題上多啲參與。


今時今日，年輕人可能對吳明欽印象唔深，吳明欽原本係中學教師，1980、90年代參與選舉，出任區議員、區域市政局議員、立法局議員，成為「三料議員」，形象正面。但好不幸，吳明欽喺1992年2月發現患上血癌，雖然做咗骨髓移植手術，但同年6月22日病逝，終年37歲。當時Senia只得3歲。


Senia今次會同另一名年輕大律師譚俊傑、「師公」李柱銘打呢場仗，佢同譚俊傑喺今年七一曾經情侶檔蹺手上街遊行，相信一定好合拍。Senia早年喺港大讀法律本科，之後去倫敦政治經濟學院讀法律碩士，仁哥笑笑口話自己都唔可以喺高院發言，讚Senia叻女！