公開幼年光頭照 陳健民﹕一切回原點

【明報專訊】佔中三子前晚同支持者一齊剃頭落髮，公民黨副主席陳淑莊（Tanya）噚日就光住頭去商台接受訪問，話決定剃頭後，即刻喺網上搜尋「無頭髮嘅新生活」點過，諗住戴帽就無問題，但髮型師提佢戴藤帽會整損頭皮，正職係大律師嘅Tanya仲話有時上庭未必要戴假髮，家未知點處理。


光頭Tanya話好快要過43歲生日，有呢個look陪住都幾有趣，又話原來瞓覺時感覺個頭好凍，要搵毛巾蓋住。


同場嘅民主黨前主席楊森，就話自己決定剃頭嗰晚諗過先同太太講，但喺客廳企咗一陣、同太太對望一陣又「收番」。仔女之後聽到都好詫異，老婆就知道佢決定咗就要做，所以無阻止，而自己一生人都未試過剃頭咁話。佔中三子之一嘅陳健民，噚日就喺facebook上載自己細個嘅光頭相，留言話係「彷彿回到生命的原點」，就好似香港30年前開始爭取民主，到人大落閘，一切回到原點一樣，但現時大家更加清醒、更加堅毅，亦係「另一場更強大的民主運動的起點」。