反佔中熱線失靈 周融變外賣佬

【明報專訊】自從「保普選反佔中大聯盟」推出2949 3193熱線（有人稱佢為「搞四搞三」熱線），收集市民舉報任何人喺中學公開策動罷課資料後，一眾網民響應「高登仔」號召，齊齊打電話去「叫外賣」。不過，網民投訴無人送外賣，有人見狀，就惡搞大聯盟召集人周融，將佢變成「外賣佬」，拎住外賣籃送飯盒。


大聯盟前日已呼籲大家唔好亂打電話去佔線，否則不排除報警處理。噚晚大聯盟出新聞稿，話熱線電話「由於被惡意破壞，暫時不能接通，一經修復會盡快通知」，請提供情報者轉用電郵sign4peace@yahoo.com.hk或傳真2473 0918。


網民除咗改圖惡搞周融，仲齊齊發揮小宇宙，將被喻為「潛力圖」嘅大聯盟大合照改圖，加上五花八門嘅「八字真言」，Emily見到有大聯盟成員手持「食雞一定要有薑蓉」、「我哋依班打工仔！」、「國之將亡必有妖孽」同「加入維穩發展潛能」等標語嘅惡搞相。


藝術家黃國才仲好搞鬼，整咗張無字版本，方便大家使用，呼籲「救救孩子，捍衛學生，打倒愚笨，發揮潛能，拿去使吧！」