新聞類別
副刊
詳情#
【明報專訊】佔中如箭在弦，警方已經頻密部署佔中清場，泛民佔中陣營亦加緊應對。華人民主書院噚日搞咗場公民抗命演練，除咗演練警方抬人離場呢啲常規手段外，仲租咗兩部水車，模擬警方出動水炮清場情况。不過，演練嘅動作就令大家幾尷尬，其中主辦單位叫參與者見到有水時，即刻轉身成個人趴喺地，並將頭部「攝入」其他參與者嘅大腿兩側，即屁股對下位置。唔少參加者聽到呢個指示臉青猶豫，但既然都「濕咗個頭」，唯有「硬着頭皮頂大髀」！
參與演練嘅近40人，包括真普聯召集人鄭宇碩，民主黨何俊仁、劉慧卿、李永達，社民連長毛梁國雄、阿牛曾健成等。
佢哋每5至6人一行，手蹺手排排坐，活動模擬3種水炮發射下嘅應對情况，包括坐低面對面直射、背對直射，同埋趴低「背向天」直射。一聲令下，兩支高壓水喉就朝住佢哋係咁噴射，前後射咗5、6次，每次大約一兩分鐘。
開頭略尷尬 之後「愈練愈放」
今次活動搞手陶君行（阿陶）就話，最理想嘅情况下，一聽到警方話要出動水炮後，參與者應該要即時轉身成個人趴喺地，頭部就「攝入」其他參與者嘅大腿兩側，咁做可以令啲水順住個身流走，減低水炮嘅傷害，但一開頭唔少人覺得有啲尷尬，之後大家先「愈練愈放」完成指示。
著拖鞋戴泳鏡 衣著唔合格
現場所見，唔少參與者都出現「蝦碌」場面，例如鄭宇碩、長毛同阿牛著拖鞋嚟，畀阿陶話係錯誤服飾，應該要著番平時嘅服飾先啱。李永達唔知係咪以為去游水，戴泳鏡嚟，結果畀水喉一射甩埋。有女士慘被水炮射到「走光」，而何俊仁穿白褲嚟，結果一濕就「透底」喇！
Emily之後問水車師傅，佢話今次出動嘅水車壓力最高達100磅，但同消防車嘅威力仲差4至5倍！
留言 (0)
