信和二少出動 推廣尖東商場

【明報專訊】信和將同澳洲旅遊局，喺旗下嘅尖沙嘴中心同帝國中心舉行「品味澳洲」活動。兩個商場入面會有12間餐廳，由家至10月5號，引入澳洲食材，烹調各種菜式。


一直好少露面嘅信和二少、集團主席行政助理黃永龍，尋日都有出黎。二少仲話，佢哋新加坡嘅姊妹公司遠東機構，已經同澳洲旅遊局合作咗年半，主要搞酒店生意。喺哥倫比亞大學畢咗業兩年嘅佢，亦都好謙咁話，依家學緊打理家族生意。


信和方面就預計，今次呢個活動，可以為旗下尖沙嘴兩個商場帶動20%人流增長，同埋25%生意額增長。兩間商場入面嘅食肆生意額，按年都有升15%至20%，而且仲佔整體生意額一半。至於商場舖租金，就介乎50至200元一呎，黎緊今年租約期滿嘅部分續租舖位，租金會有雙位數字嘅提升。