何謂青年 考起霍啓剛

【明報專訊】建制開始辦政改論壇

人大常委會嘅政改決定，唔少人都覺得好保守，建制派就落力宣傳要「袋住先」。雖然人大決定只係剛剛宣布，但建制團體已經開始搞政改論壇，好似噚日菁英會、香港青年聯會等就搞咗個青年領袖論壇，請咗港區人大代表譚惠珠同廖長江去講政改，作為青年聯會主席嘅霍啟剛當然有出席，不過，被問到要喺提委會度爭取青年界別，啟剛就坦言有難度喇。


霍啟剛會前同一眾傳媒傾偈，佢都覺得希望民意可以令政改通過，又話嚟緊都會搞吓民調等，了解市民睇法。雖然政改框架已定，但部分問題仍待本地立法處理，好似家提委會內有38個分組界別，唔少人都建議要調整，應該加入青年、婦女等界別，Emily當然問吓啟剛，會唔會幫手爭取設青年界別呢？


「45歲算係青年？」

點知啟剛話，要設青年界別都有難度，因為大家到時就會討論點先算係青年，「可能19、20歲嘅，會問點解45歲都仲算係青年？」連佢都咁講，睇怕提委會要設青年界別嘅機會都好細喇。