德國「e-道」 港人下月可用

【明報專訊】港人到外地旅行，少不免要排長龍等候櫃台人員做過關檢查，入境處噚日公布好消息，下月1日起會同德國推行「互相使用自助出入境檢查」，到時港人只要持有特區電子護照，即可以喺德國法蘭克福機場登記，經當地嘅「EasyPASS」（即係類似香港嘅「e-道」）過關，而德國旅客預計由11月起亦可登記使用香港「e-道」，方便又快捷。


入境處助理處長（資訊系統）周康道話，繼上年底同韓國推行互相使用自助出入境檢查之後，處方早前與德國聯邦內政部達成協議，任何特區電子護照持有人，只要年滿18歲、喺德國無不良紀錄，就可以由下月起帶同電子護照，喺法蘭克福機場填寫表格登記。


登記咗嘅港客，之後無論喺法蘭克福機場、慕尼黑機場、杜塞爾多夫機場抑或漢堡機場，都可以使用當地嘅「EasyPASS」，到11月仲可以喺上述任何一個機場辦理登記手續。經「EasyPASS」過關，只要將護照放喺證件閱讀器上認證，進入通道之後，面向鏡頭核實身分，然後按指示到通道後方嘅櫃台蓋章就完成。