馬雲首創邊煲劇邊淘寶

【明報專訊】家啲電視劇、電影等等，都有唔少植入式廣告，有時無啦啦會影住個主角部電話，老實講咁hardsell都幾煩。之不過，向來計仔多多嘅阿里巴巴執行主席馬雲，就度咗條新橋，就係賣廣告之餘，又唔會太令觀眾反感。話說今年阿里入股咗優酷土豆後，已經準備利用呢個全中國最大嘅網上影視平台，谷起旗下淘寶同天貓嘅生意。


明報記者 岑梽豪

優酷土豆董事長古永鏘，日前接受《彭博》訪問嗰陣話，佢哋同阿里諗住喺啲電視劇或電影入面，畀人一路睇一路買。例如你見到《來自星星的你》都教授件衫好型，即刻有件衫嘅連結，直接上淘寶度買。咁就由被動嘅植入式廣告，變成畀觀眾主動網上購物，都咪話唔勁。


古永鏘仲話，唔止係衫咁簡單，第時你見到戲入面間屋啲家俬，都可以即㩒即買，到時候仲唔係購物煲劇一家親？其實阿里個野心相當大嘅，呢種玩法唔止係同優酷土豆合作，仲連埋樂視、風行網等齊齊做。雖則小琴覺得，呢條計仔係幾好，但到時又要煲劇又要買嘢，唔知做得邊樣。


看中劇中家俬 或可即時買

話說早兩日阿里同萬科合作，喺淘寶上使過錢，可以當買樓折扣，小琴忽發奇想，唔知第時睇睇下劇，見到間屋唔錯想買，可唔可以連去萬科個網度，直接買埋樓呢？又或者啲土豪睇睇下恒大足球隊球賽直播，覺得班友踢得唔多好，連去阿仙奴或多蒙等個網度，直接買個球星返嚟，咁就過癮囉。


話時話，其實馬雲都好似內地消費者同中小企嘅「救世主」咁樣，一時補貼啲小市民搭的士，一時又資助一班出口商做貿易生意。


email: piano@mingpao.com

[小琴密語]